Posts
Tume ya Madini Kutekeleza Majukumu Yake Kwa Maslahi ya Taifa Frank Mvungi- MAELEZO, Dodoma Tume ya Madini imetakiwa kuhakikisha inatekeleza kikamilifu jukumu la usimamizi, Udhibiti, Ukaguzi, Ufuatiliaji, Ukusanyaji wa taarifa na kuweka kumbukumbu kwa kusimamia sekta hiyo kwa uadilifu hali itakayosaidia Taifa kunufaika na uwepo wa rasilimali madini. Akizungumza wakati akizindua Tume hiyo Jijini Dodoma, Waziri wa Madini Mhe. Angellah Kairuki amesema kuwa kuzinduliwa kwa Tume hiyo kunaashiria kuanza kwa ukurasa mpya katika sekta ya madini nchini kwa kuwa uamuzi huo ni mapinduzi makubwa hali itakayosaidia wananchi kunufaika na sekta hiyo. "Ni imani yangu, na pia ni imani ya Mheshimiwa Rais Dkt. John Pombe Magufuli na imani ya Watanzania wote kuwa mtatubadilishia simulizi za sekta ya madini kutoka kuwa za kukatisha tamaa na kuwa za matumaini, kuibadili historia ya sekta ya madini kutoka kuwa ya miguno na manunguniko na kuwa yakujivunia" Alisisitiza Mhe. Kairuki Akifafanua Mhe. Kairuki amesema kuwa, si kwamba Tume hiyo imepewa mamlaka makubwa bali pia imepewa imani kubwa kwa kuwa mamlaka makubwa yanakuja na wajibu mkubwa mikononi mwa watendaji wa Tume hiyo. Aliongeza kuwa Watanzania wana matarajio makubwa na Tume hiyo na viongozi wake kwa kuwa Serikali na wananchi wanaamini kuwa sekta hiyo sasa iko katika mikono safi na salama. Kutokana na imani hiyo Mhe. Kairuki amesema kuwa wananchi wanaamini Tume hiyo itatenda haki, kusimamia ukweli na kuzingatia maslahi ya kizazi hiki na kijacho ili viweze kunufaika na madini ambayo Mwenyezi Mungu amelijalia Taifa letu. Aidha, Mhe. Kairuki ameitaka Tume hiyo kuhakikisha inasimia kikamilifu wachimbaji wadogo kwa kuwatambua na kurasimisha shughuli zao ili sekta hiyo iwanufaishe kama ilivyo azma ya Serikali ya Awamu ya Tano. Kwa upande wa vibali vya mauzo ya madini nje ya Nchi amesema kuwa ni vyema Tume ikafanya mapitio ya fomu na vibali ili kuhakikisha kuna maelezo na taarifa za kina za madini yanayosafirishwa kuhusu yalipotoka (origin),. Vile vile kwa kushirikiana na vyombo vya ulinzi na usalama ameitaka Tume iandae mbinu na mikakati ya kudhibiti utoroshaji wa madini ili kudhibiti biashara haramu ya madini. Tume ya madini imetakiwa kuangalia uwezekano wa kuweka utaratibu wa kutoa bei elekezi za madini ya aina mbalimbali ambapo utaratibu huo utawasaidia wachimbaji wadogo na wa kati. Pia Mhe. Kairuki ameitaka Tume hiyo kuhakikisha kuwa kila anayefanya biashara ya madini ana leseni na ni leseni hai iliyolipiwa na kuhakikisha kwamba inathibiti watu au makampuni yanayomiliki leseni walizopewa kwa muda mrefu bila kuziendeleza kinyume na masharti ya leseni hizo. Kuwepo kwa utaratibu wa kufanya ukaguzi wa mara kwa mara kuona maendeleo ya uwekezaji katika migodi ambayo imepata leseni ni moja ya jukumu ambalo Tume hiyo inatakiwa kulitekeleza. Kwa upande wake Mwenyekiti wa Tume ya Madini Prof. Idrissa Kikula amesema kuwa wamepokea maelekezo yote ya Serikali na Tume hiyo iko tayari kufanya kazi kwa maslahi ya Taifa . Aliongeza kuwa Tume imejipanga kuhakikisha kuwa inatatua migogoro iliyopo katika sekta hiyo kwa kushirikisha vyama vyao vilivyopo katika maeneo yao. Tume ya Madini imeundwa ikiwa ni sehemu ya juhudi za Serikali ya Awamu ya Tano kuhakikisha kuwa rasilimali za Taifa zinawanufaisha wananchi wote, Kutokana na azma hiyo Tume imepewa jukumu la kusimamia sekta ya madini na Wizara ya Madini kubaki na Masuala ya kisera.
Dkt. Mwakyembe : Atoa Rai kwa Kampuni ya Multichoice Kushirikiana na Wizara ya Elimu Katika Kukuza Elimu ya Sanaa. Na Lorietha Laurence-WHUSM, Dodoma Waziri wa Habari, Utamaduni, Sanaa na Michezo Mhe.Dkt. Harrison Mwakyembe ametoa rai kwa Kampuni ya Multichoice nchini kushirikiana na Wizara ya Elimu, Sayansi na Teknolojia pamoja na vyuo vinavyotoa elimu ya sanaa ya filamu ili kuhakikisha wanabadilishana ujuzi na kuwa na miradi ya pamoja. Dkt. Mwakyembe ameyasema hayo jana Jijini Dodoma wakati akizindua mradi wa kampuni hiyo utakaowapa fursa ya kujiendeleza kitaaluma vijana wenye vipaji katika tasnia ya filamu kwa kupata ufadhili wa mafunzo kwa muda wa mwaka mmoja katika chuo cha sanaa Jijini Nairobi nchini Kenya. “Napenda kuwapongeza Multichoice kwa kushirikiana na Serikali katika kuhakikisha wanaleta maendeleo, huu ni mwanzo mzuri wa kuboresha taaluma kwa vijana ambao asilimia kubwa wamejiajiri katika sekta ya sanaa ikiwemo filamu” Dkt. Mwakyembe Aidha,Dkt. Mwakyembe amewataka vijana mabao wanakidhi vigezo kuhakikisha wanachangamkia fursa hiyo adimu ili waweze kuongeza ujuzi na hivyo kuwa chachu ya maendeleo pale wanaporudi nyumbani kwa kuwafundisha wengine ili elimu hiyo kuwafikia vijana wengi zaidi. Alizidi kufafanua kuwa ili kuwa na maudhui mazuri yenye kuvutia, yanayokwenda na wakati huku yakizingatia tamaduni za nchi yetu, ni lazima tuwe na wataalamu wetu wenyewe wa kuzalisha kazi hizo za kisanii, kuanzia waigizaji, waandika hadithi, waandaaji na wazalishaji. Naye Mkurugenzi Mtendaji Multichoice Africa - Mashariki na Magharibi, Bw. Maharage Chande ameeleza kuwa Multichoice Afrika imeanzisha Multichoice Talent Factory inayolenga kuwapa vijana wenye vipaji fursa maalum ya kupata mafunzo katika sekta ya filamu. “Kwa kuanzia tutakua na vituo vitatu vya mafunzo kimoja Afrika Magharibi, kingine Afrika Masharika na Afrika Kusini, ambapo vinatarajiwa kuanza rasmi mnamo mwezi Oktoba mwaka huu huku mchakato wa kupata wanafunzi utaanza mwezi Juni mwaka huu” Bw. Chande Adha Bw. Chande alisisitiza kuwa, katika kuhakikisha wanafanikisha zoezi hilo kwa ufanisi watashirikiana kwa karibu na wadau wa tasnia ya filamu hapa nchini katika mchakato mzima wa kuweza kuwapata vijana watakaofuzu kujiunga na mafunzo hayo.
